Xoojinta Iskaashiga Soomaaliya iyo Yeman: Kulanka Danjiraha Soomaaliya iyo Wasiirka Gaashaandhigga Yeman

Magaalada Cadan, Danjiraha Jamhuuriyadda Federaalka Soomaaliya ee Dalka Yeman, Mudane Cabdixakiim Maxamed Axmed, ayaa kulan muhiim ah la yeeshay Wasiirka Gaashaandhigga Yeman, Mudane Muxsen Maxamed Al-Daacari.

Kulankan ayaa diiradda lagu saaray adkeynta iskaashiga labada dal ee walaalaha ah, gaar ahaan arrimaha amniga, ilaalinta xuduudaha, iyo horumarinta xiriirka dowladaha.

Wasiirka Gaashaandhigga Yeman, Mudane Muxsen Maxamed Al-Daacari, ayaa sheegay in Soomaaliya iyo Yeman ay leeyihiin xiriir adag oo soo jireen ah, isla markaana shacabka Yeman aysan marnaba ilaawi karin taageerada joogtada ah iyo moqifka wanaagsan ee Dowladda Federaalka Soomaaliya u muujisay dalkooda.

Safiirka Soomaaliya ayaa Wasiirka Gaashaandhigga Yeman u gudbiyey salaam uu ka siday Wasiirka Gaashaandhigga Soomaaliya, Mudane Axmed Macallin Fiqi. Intaa kadib, Safiirka ayaa xusay in Soomaaliya ay ka go’an tahay xoojinta iskaashiga labada dal iyo taageeridda dadaallada lagu gaarayo horumar iyo xasillooni.

Kulankan ayaa lagu tilmaami karaa mid muhiim ah oo dhanka xiriirka diblomaasiyadeed iyo amniga gobolka ka dhaca, isagoo mar kale caddeynaya in Soomaaliya ay door muuqda ka qaadato taageerada iyo xoojinta iskaashiga wadamada walaalaha ah.