Madal Muhiim ah: Doorka Dhalinyarada ee Ka Hortagga Fikirka Xagjirka Rabshadaha Wata

 

Muqdisho – Xarunta Qaran ee La-Dagaalanka Fikirka Xagjirka Rabshadaha Wata (Tubsan) ayaa magaalada Muqdisho ku qabatay madal dood cilmiyeed oo lagu falanqeeyay kaalinta dhalinyarada ee ka hortagga fikirka xagjirka ah iyo sidii loo xoojin lahaa doorkooda muuqda ee nabad-dhisidda.

Madasha waxaa si rasmi ah u furay Wasiir Dowlaha Xafiiska Ra’iisul Wasaaraha, Mudane Xirsi Gaani, oo xusay in dhallinyaradu yihiin awoodda ugu weyn ee bulshada, laguna baahan yahay in la kordhiyo wacyigelinta, xirfadaha fikirka kritikalka ah, iyo ka qaybqaadashada amniga bulshada.

Kulanka waxaa ka soo qaybgalay mas’uuliyiin sar-sare oo ka tirsan hay’adaha dowladda, kuwaas oo si isku mid ah u adkeeyay muhiimadda ay leedahay in dhalinyarada la siiyo fursado waxbarasho, tababarro xirfadeed, iyo wacyigelin joogto ah si looga ilaaliyo marin-habaabinta fikirka xagjirka ah.

Doodda madasha ayaa diiradda saartay kor u qaadista wacyiga bulshada, dhisidda hoggaaminta dhalinyarada, iyo abuurista jawi taageera doorkooda ku aaddan nabad-dhisidda iyo iska-caabbinta xagjirnimada rabshadaha wata. 

Agaasimaha Guud ee Tubsan, Mudane Cali Yaasin Gurbe, ayaa tilmaamay in dhalinyaradu yihiin bartilmaameedka ugu weyn ee kooxaha xagjirka ah, taas oo ka dhigaysa muhiimad gaar ah in la dhiso difaac bulsho oo ku saleysan aqoon, xog-ogaalnimo, iyo faham dhab ah.

In ka badan 150 dhalinyaro ah oo ka kala socday qaybaha kala duwan ee bulshada ayaa ka soo qaybgalay madasha, iyaga oo soo bandhigay aragtiyo iyo talooyin wax-ku-ool ah oo lagu horumarinayo ka hortagga xagjirnimada.

Madashu waxay muujisay in dhallinyaradu ay door muhiim ah ku leeyihiin xasilloonida, nabad-dhisidda, iyo ka hortagga xagjirnimada, iyadoo la adkeeyay in maalgashiga aqoontooda, xirfadahooda, iyo fursadahooda uu yahay furaha lagu dhisayo bulsho adkaysi leh oo ka fog marin-habaabinta una jihaysan horumar waara